Canzoni

SANTA LUCIA LUNTANA

Anno: 1919

Gruppo:

Testo e musica: E. A. Mario

Menu


«Parteno 'e bastimente
pe terre assaje luntane...
Càntano a buordo: só Napulitane!
Cantano pe tramente
'o golfo già scumpare,
e 'a luna, 'a miezo 'o mare,
nu poco 'e Napule
lle fa vedé

Santa Lucia!
Luntano 'a te,
quanta malincunia!

Se gira 'o munno sano,
se va a cercà furtuna...
ma, quanno sponta 'a luna,
luntano 'a Napule
nun se pò stá!


E sònano...Ma 'e mmane
trèmmano 'n copp’ 'e corde...
Quanta ricorde, ahimmé, quanta ricorde...
E 'o core nun 'o sane
nemmeno cu 'e canzone:
Sentenno voce e suone,
se mette a chiagnere
ca vò turná

Santa Lucia!
Luntano 'a te,
quanta malincunia!

Se gira 'o munno sano,
se va a cercà furtuna...
ma, quanno sponta 'a luna,
luntano 'a Napule
nun se pò stá!


Santa Lucia, tu tiene
sulo nu poco 'e mare...
ma, chiù luntana staje, chiù bella pare...
È 'o canto d’ ‘e sirene
ca tesse ancora 'e rezze!
Core nun vo’ ricchezze:
si è nato a Napule,
ce vò murí!

Santa Lucia!
Luntano 'a te,
quanta malincunia!

Se gira 'o munno sano,
se va a cercà furtuna...
ma, quanno sponta 'a luna,
luntano 'a Napule
nun se pò stá!

Note

Santa Lucia luntana è dedicata ai tantissimi emigranti partenopei che partivano dal porto di Napoli alla volta di terre lontane